• Նորություններ
• Հղումներ
• Կայքի Քարտեզ
• Գործընկերներ

 ԱԳԱՐԱԿ: Գտնվում  է  Արագածոտնի  մարզի  Աշտարակի  ենթաշրջանում,  գրավում  է  մի տարածք, որը  ձգվում  է  ժամանակակից  Ագարակ  և  Ոսկեհատ  գյուղերի  միջև:  Հուշարձանախումբը   ներկայացված  է  քարակոփ ու ժայռափոր  կերտվածքների  համալիրներով  և  դրանց  շուրջ  տարածված  բազմաշերտ  բնակավայրերով ու  դամբարանադաշտերով:  Պեղումները  սկսվել  են  2001 թ. ՀՀ  ԳԱԱ    Հնագիտության  և  ազգագրության  ինստիտուտի կողմից (ղեկավար` Պ. Ավետիսյան): 

Այստեղ  ի հայտ են  եկել կարմիր  անգոբապատ  և փայլեցված  ուրարտական  խեցեղենի նմուշներ,  գլանաձև  կնիք,  պերճանքի  առարկաներ ևն:  Ուրարտական  շերտում  հայտնաբերված ամենամեծ  անակնկալը  առաջին  հարթակի  հարավային  եզրին  2004 թ. բացված, հատակագծային  ինքնատիպ  լուծումով  վիմափոր  դամբարանն  է:  Համալիրը  կազմված  է նախամուտքից, մուտքից  և  մեկ  ձեռակերտ սրահից:  Կամարաձև  առաստաղով  դամբարանասրահը հատակագծում  ուղղանկյուն է` երկայնական  առանցքով  ուղղված  հյուսիսից  հարավ:  Դամբարանի  չափերն  են`  2,15x3,5x1,85 մ:   Սրահի  երեք  պատերին  փորված  են  մեծ  ու  փոքր  ուղղանկյուն  որմնախորշեր,  իսկ  եզրերին` ութ  պնակաձև  փոսիկներ:  Ցավոք  այն  ամբողջովին   թալանված  էր:

Գրականություն: Քալանթարյան 2005; Քալանթարյան, Մելքոնյան 2005; Аветисян 2003

Աղբյուրը՝

Ուրարտուի հնագիտություն  (Ամրոց-բնակավայրեր և դամբարանային համալիրներ) Երևան: Երևանի համալս. հրատ. 2008 , 161-163  էջ