• Նորություններ
• Հղումներ
• Կայքի Քարտեզ
• Գործընկերներ

 ՆԵՐՔԻՆ  ԽՆՁՈՐ  (ՔԱՅԱԼԸ  ԴԵՐԵ): Դամբարանը հայտնաբերվել  է  վերին  ամրոցի  ժայռի  հարավային  եզրին:  Այն  ունի  նեղ  մուտք  և  դամբարանի  խորքը  տանող  չորս  աստիճաններով  նեղ դրոմոս,  որով  կապվում  է  վեց  սենյակներից  բաղկացած  դամբարանին: Առաջին  սենյակի  դուռը  ծածկված  է  եղել  երեք  խոշոր  սալաքարերով:  Այս  սենյակները  ուղղանկյուն  են,  սակայն  չորրորդ  և  վեցերորդ  սենյակների  պատերը  փոքր-ինչ  շեղված  են:  Երրորդ  և  հինգերորդ  սենյակների  պատերի  մեջ  կան կամարաձև  վերնամասեր ունեցող ութական խորշեր:  Բացի  խորշերից,  երրորդ  սենյակի  հետևի  պատին  կից  կառուցվել  էր  մի  հարթակ,  որի  մեջ  փորված  էր  1,5  մ  երկարություն  ունեցող  սարկոֆագ:  Հետաքրքիր  է  նաև  վեցերորդ  սենյակը,  որի  հատակին`  բոլոր  պատերի  տակ,  փորված  էին  36  կլոր  փոսիկներ`  ըստ  երևույթին  մոմակալներ  տեղադրելու  համար:

Դամբարանի  սրահներից  երեքի  հատակների  անկյունային  մասերում  փորված  են  գլանաձև հորեր:  Այս  երեք  հորերից  երկուսը  պեղվեցին,  և  նրանց  հատակներին  գտնվեցին  լավ  մշակված  քարաբեկորներ: Չ.  Բըրնիի  կարծիքով`   դրանք  ծառայել  են  որպես  զոհարաններ:  Դամբարանները  կառուցվել  են  Ք.ա.  VIII  դ. երկրորդ  կեսին:  Այդ  թվագրությունը  հաստատվում  է  նաև  այստեղ  գտնված  իրերով:  Դրանց  թվին  են  պատկանում  մոտ  մեկ  տասնյակ երկաթե  տերևաձև  և  նշաձև  պոչուկավոր  նետասլաքները, որոնք  հայտնի  են  Թոփրաք Քալեից,  Ալթըն Թեփեից,  Հայկաբերդից  և  այլն:  Հետաքրքիր  են  այստեղ  գտնված  կահույքի  մասերը, որոնց  մեջ  ամենամեծ  խումբն  են  կազմում  աթոռների  ոտքերի   ծայրակալները:  Դրանց  մի  մասը  բրոնզե  խողովակներ  են,  իսկ  մյուսները  ցլի  ոտքի  կամ  առյուծի  թաթի  ձև  ունեն:  Գտնվել  են  նաև  զարդերª  բրոնզե  ապարանջան,  արծաթե  շքասեղ  և  օղ,  բրոնզե  ասեղ,  կոճակ  և  այլն:

Գրականություն: Lloyd, Burney 1965; Burney 1966

Աղբյուրը՝

Ուրարտուի հնագիտություն  (Ամրոց-բնակավայրեր և դամբարանային համալիրներ) Երևան: Երևանի համալս. հրատ. 2008 , 150-152էջ